Blog do Espacio Literario Caixanova

Para este novo curso de Obradoiros, literarios, de lectura, etc… imos seguir, na cidade de Vigo, cunha actividade que empezou o ano pasado e que funcionou moi ben: as tertulias literarias.

En próximos días esperamos poder ofrecer as datas concretas en que nos xuntaremos para falarmos de libros e lecturas. Coma sempre, contra fin de mes.

Pode asistir calquera e non é necesario anotarse.

Tamén coma sempre, a través deste medio iremos informando, ben sexa recordando a seguinte sesión, ben sexa dando conta das recomendacións que alí se fagan.

O ano pasado foi en Vigo, pero este ano será en Ourense e, despois, en Pontevedra, onde o profesor e crítico literario Ramón Nicolás impartirá o Obradoiro de Lectura. Serán 5 sesións que darán comezo o vindeiro 22 de outubro en horario de 18,15 a 20,15.

O obradoiro de lectura parte da pregunta “¿Gústache ler?” e ten como obxectivo a apreciación dos valores das obras literarias consideradas por crítica e lectores como as máis relevantes na historia da literatura universal.

Nas clases, traballarase sempre a través da lectura dos propios textos producidos por algúns dos mellores escritores, iluminados por algunhas explicacións orientativas.

RAMÓN NICOLÁS RODRÍGUEZ

 Licenciado en Filoloxía galego-portuguesa. Profesor de lingua e literatura galega. Exerceu a docencia na Universidade de Vigo e é crítico literario desde 1990. Colabora en diversos medios, como a sección “Breviario” da revista “Biblos. Club de lectores” e “Libro aberto” da TVG. Entre as súas obras destacan “Entrevistas con Álvaro Cunqueiro”, “Papeis de Literatura”e “Manuel Lugrís Freire. Vida e obra”.

Este ano, Caixanova organiza en Vigo un curso de literatura que, baixo do título xenérico “O traballo literario a través dos escritores”, desenvolverase entre o  20 de novembro de 2008 e o 21  de Maio de 2009. O obxectivo central é ofrecer un programa de oito conferencias a cargo de relevantes escritoras e escritores que teñan destacado dunha maneira moi importante nos últimos tempos nas nosas letras. Os conferenciantes serán Antón Reixa, Cesáreo Sánchez Iglesias, Domingo Villar, Francisco Castro, Yolanda Castaño, Ramón Nicolás, Rubén Ruibal, Chelo Suárez e Begoña Paz.

A entrada é libre. Será en Vigo, na Sala de Conferencias do Centro Social Caixanova ás 20 horas.

O vindeiro día 16 de Setembro, martes, abrirá o prazo para a matrícula no Obradoiro Literario en Vigo.

Coma sempre, hai 15 prazas que se cubrirán por estrita orde de matrícula. Pode facerse en calquera sucursal de Caixanova.

A data de comezo é o vindeiro día 6 de Outubro, luns, en horario de 18 a 20 horas. Serán oito sesións seguidas. Os días 6, 13, 20 e 27 de Outubro, e o 3, 10, 17 e 24 de Novembro. Dous meses intensos de traballo.

Onte procedeuse á presentación da programación cultural de Caixanova diante dos medios de comunicación.

Entre a gran cantidade de espectáculos e exposicións interesantes, anúnciase tamén a continuidade dos obradoiros literarios. Daquela, axiña poderemos informar das datas de matrícula.

Hai uns días publicamos un texto que lle seleccionaron a Susi Romero de la Torre no concurso dos Relatos de Verán de La Voz de Galicia.

Hoxe, agasállanos cun outro relato que veñen de publicarlle na revista cultural Lenguas de Fuego e que leva por título ¡Vaya por Dios!

Podédelo ler aquí.

O autor de best-sellers, John Grisham, coñecidísimo polas adaptacións ao cinema de títulos como El informe pelícano, El cliente, La tapadera… é un exemplo da importancia da paciencia porque a súa primeira obra ( para el a mellor de todas ) e na que invertiu moitísimos anos, titulada Tiempo de Matar, pasou absolutamente desapercibida, tanto a nivel de vendas como a nivel de crítica.

Sen embargo hoxe é un dos autores que máis libros vende no mundo.

Así que paciencia.

Giovanni Papini foi un escritor italiano que unha vez escribiu algo que nos fai pensar que calquera vida, ben contada, pode ser obxecto de traballo literario.

Concretamente escribiu: Se un home calquera, incluso vulgar, soubese narrar a súa propia vida, escribiría unha das máis grandes novelas que xamais se escribiu.

Daquela, non hai que procurar por aí  xente excepcional.

O excepcional é contar ben a vida de calquera.

Establécense dúas modalidades de premio: Modalidade Infantil, para obras de narrativa dirixidas a lectores de 7 a 12 anos. Dotado con 25.000 euros. Modalidade Xuvenil, para obras dirixidas a lectores de máis de 12 anos, dotado con 30.000 euros. O feito de participar nunha modalidade exclúe a posibilidade de facelo na outra.

A concesión do premio en calquera das modalidades inclue a edición nas diversas linguas do Estado español –por parte de Edebe- das obras premiadas. O importe computarase á conta dos dereitos do autor segundo contrato habitual de Edebé.

A editorial Edebé terá unha opción preferente para a adquisición dos dereitos, en todas as linguas do Estado español, das obras que o xurado considere de interese publicar e que non obtivesen  premio nalgunha das modalidaes.

As obras deberán ser orixinais totalmente inéditos, de tema libre e escritos en castelán ou en calquera das linguas do Estado. O xénero literario debe ser novela. Remitiranse 3 copias a este enderezo: Premio Edebé de literatura Infantil e Xuvenil. Editorial Edebé, Paseo San Juan Bosco, 62. 08017 Barcelona. Deberase especificar claramente a que modalidade do Premio de Literatura se opta.

A extensión das obras será dun mínimo de 20 páxinas e dun máximo de 80 para a modalidade infantil, e de 80 a 200 para a xuvenil. Os traballos presentaranse mecanografados a dobre espazo e escritos por unha soa cara en follas de papel tamaño DIN-A4. De ser posible, acompañaranse dunha copia en soporte informático.

Os orixinais enviaranse nunha plica. As plicas deben conter co nome, o enderezo e o teléfono do autor. O xurado procederá á apertura de plicas tras emitir o ditame do premio nas súas dúas modalidades.

Cada concursante poderá enviar  todos os orixinais que desexe. O feito de participar implica o compromiso de non optar a outros premios coas obras presentadas a concurso, así como a ausencia de compromisos editoriais previos ou simultáneos para as mesmas. O prazo de admisión de orixinais rematará o 15 de setembro do 2008. Non se poderá presentar ao concurso o persoal do grupo Edebé.

O xurado será nomeado por Edebé e estará formado por especialistas en literatura e educación. A súa composición darase a coñecer no momento de publicar o ditame do premio. O xurado enitirá un veredicto inapelable.

O veredicto do xurado será dado a coñecer a finais de xaneiro do 2009 no transcurso dun acto que se convocará para este fin.

Os orixinais non-premiados poderán ser devoltos dentro dos catro meses seguintes á adxudicación do premio, se así o solicitan os autores; despois desta data, poderanse destruír. A editorial non responde, en ningún caso, do extravío ou  perda dalgún orixinal.

A participación no Premio Edebé de Literatura Infantil e Xuvenil implica a plena conformidade e aceptación destas bases.

Eusebio ( outra vez ) envíanos estas reflexións de Milan Kundera en A insoportable levidade do ser. Interensantísimo:

“…os personaxes non nacen como os seres humanos do corpo da súa nai, senón dunha situación, unha frase, unha metáfora na que está depositada, como dentro dunha noz, unha posibilidade humana fundamental que o autor cre que ninguén descubriu aínda ou sobre a que ninguén dixo aínda nada esencial.”
“Os personaxes da miña novela son as miñas propias posibilidades que non se realizaron. Por iso quéroos a todos por igual e todos prodúcenme o mesmo pánico: cada un deles atravesou unha fronteira por cuxas proximidades non fixen máis que pasar. É precisamente esa fronteira (a fronteira tras a cal remata o meu propio eu), a que me atrae. É máis alá dela onde comeza o segredo polo que se interroga a novela. Unha novela non é unha confesión do autor, senón unha investigación sobre o que é a vida humana dentro da trampa na que se converteu o mundo.”